Nikahın pozulması

Məhkəmədə nikahın pozulması

 

MƏLUMAT

Ər-arvadın yetkinlik yaşına çatmayan (18 yaş) ümumi uşaqları olduqda və ya ər (arvad) nikahın pozulmasına razı olmadıqda nikah məhkəmə qaydasında pozulur.

Ər-arvadın razılığı olduqda, lakin onlardan qeydiyyat şöbəsində nikahın pozulmasından yayındıqda (ərizə verməkdən imtina etdikdə, nikahın pozulmasının dövlət qeydiyyatı üçün gəlmədikdə və s.) nikahın pozulması məhkəmə qaydasında həyata keçirilir.

Nikahın pozulması üçün hara müraciət edilir?-

Mediasiya təşkilatına və məhkəməyə

Nikahın pozulması ailə mübahisəsi olduğu üçün qanuna əsasən mütləq mediasiyadan keçməlidir.

Mediasiya prosesi necə başlayır?

Mediasiya prosesi qarşı tərəfə Təklifin göndərilməsi ilə başlayır.

• TƏKLİF

Təklif yazılı şəkildə tərtib olunur. Təklifdə qarşı tərəfə öz tələblərinizi bildirirsiniz. Təklif nümunəsini aşağıdakı linkdən əldə edə bilərsiniz

http://mediasiya.gov.az/qanunvericilik/mediasiya-surasinin-senedleri

• İlkin mediasiyanın keçirilməsi üçün ərizə ilə mediatora müraciət

Təklifi göndərdikdən 10 gün keçdikdən sonra Ərizə ilə mediatora (mediasiya təşkilatına) müraciət edilir.

Ərizədə nəzərdə tutulan bütün məlumatlar doldurulur.

Ərizəyə aşağıdakı sənədlər əlavə edilir:

1) təklifi göndərdiyiniz zaman poçt qəbzinin surəti;

2) təklifin surəti.

Ərizəni imzalayıb poçt vasitəsilə seçdiyiniz mediasiya təşkilatına göndərirsiz.

Ərizə nümunəsini aşağıdakı linkdən əldə edə bilərsiniz

https://mediation.az/ilkin-mediasiya-sessiyasi-ucun-erize/

Qeyd: mediasiya təşkilatına ərizənizi (əlavə edilən sənədlərlə birlikdə) emailiniz vasitəsilə də göndərə bilərsiniz.

Mediasiya təşkilatında mediasiya prosesi necə başlayır?

Mediasiya prosesinə dəvət

İlkin mediasiyanın keçirilməsi üçün Ərizəniz mediasiya təşkilatına çatdıqdan sonra sizin və qarşı tərəfin əlaqə üçün qoyduğunuz mobil nömrələrinizə mediasiya prosesinin vaxtı və yeri barədə bildiriş gəlir.

Bildirişdə qeyd edilən tarixdə mediasiya prosesində iştirak edirsiz. Mediator mediasiya prosesinin nəticəsinə uyğun olaraq sizə sənəd təqdim edir. Bu mediasiya prosesininin yekununa dair arayış və s. ola bilər.

İlkin mediasiya sessiyası zamanı mediasiya xidmətinin göstərilməsinə görə haqqın və digər xərclərin məbləği nə qədərdir

50 manat               

Məhkəmədə nikahın pozulması

Məhkəmədə nikahın pozulması necə həyata keçirilir?

Bu zaman hansı sənədlər tələb olunur?

- iddia ərizəsi;

- iddiaçı və cavabdehin şəxsiyyət vəsiqələrinin surətləri;

- nikah haqqında şəhadətnamənin əsli;

- uşağın doğum haqqında şəhadətnaməsinin notarial qaydada təsdiq olunmuş surəti;

- mediasiya prosesində iştirak edilməsi barədə arayış;

- dövlət rüsumunun ödənilməsi barədə qəbz.

Məhkəmədə nikahın pozulması zamanı dövlət rüsumunun məbləği nə qədərdir?

100 manat

Nikahın pozulması barədə iddialar hansı məhkəməyə verilir?

Nikahın pozulması barədə iddialar adətən cavabdehin rəsmi qeydə alındığı yerin məhkəməsinə verilir.

ANCAQ

MPM-nin 36.3-cü və 36.5-ci maddəsinə əsasən alimentin alınması və atalığın müəyyən edilməsi haqqında iddialar, həmçinin nikahın pozulması haqqında iddialar iddiaçının yaşadığı yerə görə də verilə bilər.

Məhkəmədə nikahın pozulması necə həyata keçirilir?

Hakim iddia ərizəsini icraata götürdükdən sonra 5 gün müddətində iddia ərizəsinin surətinin və ona əlavə edilmiş sənədlərin işdə iştirak edən şəxslərə göndərilməsini və ya rəsmi qaydada verilməsini təmin edir.

Nikahın pozulması barədə iddia ərizəsi məhkəməyə daxil olduqdan sonra 40 (qırx) gündən gec olmayaraq Məhkəmənin hazırlıq iclası keçirilir. Sonrakı müddətdə işin xüsusiyyətlərindən asılı olaraq daha bir neçə hazırlıq iclası keçirilə bilər. Sonrakı iclaslar məhkəmə baxış iclasları adlanır.

Məhkəmə işdə iştirak edən şəxslərə hazırlıq iclası barədə həmin iclasın keçirilməsinə ən azı 5 (beş) iş günü qalmış məlumat verir.

Məhkəmə ərizə məhkəməyə daxil olduğu vaxtdan 4 ay müddətində nikahın pozulmasına dair qətnamə çıxarır.

Məhkəmədə nikahın pozulması zamanı nikaha xitam verilməsi vaxtı

Nikahın pozulması barədə məhkəmənin qətnaməsinin qanuni qüvvəyə mindiyi gündən nikaha xitam verilmiş sayılır.

Ər (arvad) nikahın pozulması haqqında şəhadətnaməni alana qədər yenidən nikaha daxil ola bilməz.